المعشعشة البجاوية

نبدا بسيرو او العسيلة الثقيلة نحط في كسرونة 500 غ سكر مع 250 ملل ، ( 2 كيسان سكر + كاس ماء) وعصرة تع ليمون ونخليه يثقل علا النار..

العجينة : نحط 4 بيض نخفقهم ونزيد 500-600 غ فرينة ( علا حساب نوعية الفرينة انا ماكملتليش 600 غ قعدتلي منها 70 غ تقريبا) ورشة ملح ونعجن مليح وندلك مليح حتى تترطب مليح ، العجينة تقعد يابسة نرمدها في الفرينة ونخليها ترتاح ساعتين ..
نجيب الماكينة ونحل العجينة في رقم 1 ثم نقص ترتيب رقم 4 ثم رقم 7 واخيرا رقم 9 نعود فيها من 3-4 مرات ، ثم نعقبها في ماكينة الرشتة تتقطع زي السباقيتي..
نسخن الزيت مليح ونحطها تتقلى ونقص نار نخليها ذهبية اللون فقط ، نحيها ونحطها في بابيي ساغفيات يشرب الزيت..
نحطها في قصعة كبيرة ، ونكسرها بيدي نضيف 500 غ مكسرات محمصة ومطحونة خشنة ، ونسقي بالعسل ونخلط مليح..
نجيب بلاطو انا استعملت 35*25 سم شوفو الصور ندهنو بالزيت ، ونفرغ الخليط ، نجيب ورق الطهي ونضغط بيدي ، ثم نضغط بالحلال مليح ..
نحط البلاطو في الفريجيدار يبرد مليح ونحيه ، نقطع بالموس هنا قطعت مربعات 3*3 سم نتي واختيارك ..
رح تبقى طرية ومش معمرة عسل وحاكمة روحها ، طبعا الوصفة تقدم مع الحليب ،مع القهوة مع عصير ،وحتى مع التاي ، جميع الاستعمالات .